ആലപ്പുഴ: പെരുമ്പാവൂരില് കൊല്ലപ്പെട്ട ദളിത് പെണ്കുട്ടി ജിഷയുടെ ശരീരത്തില് ചെറുതും വലുതുമായ 38 മുറിവുകളുണ്ടെന്ന് പോസ്റ്റ്മോര്ട്ടം റിപ്പോര്ട്ട് പുറത്തുവന്നു. ലൈംഗിക പീഡനത്തിന് ശ്രമം നടന്നുവെന്നും എന്നാല് പീഡനം നടന്നോ എന്ന് വ്യക്തമാകാന് ഡിഎന്എ പരിശോധന ആവശ്യമാണെന്നും റിപ്പോര്ട്ട് വ്യക്തമാക്കുന്നു.
ക്രൂരമായ മര്ദ്ദനവും ജിഷ നേരിട്ടുവെന്നാണ് റിപ്പോര്ട്ട്. അന്വേഷണ സംഘത്തിന് റിപ്പോര്ട്ട് കൈമാറി. ജിഷയെ കൊലപ്പെടുത്തിയ ശേഷം പ്രതി പീഡിപ്പിച്ചതായാണു ഫൊറന്സിക് വിദഗ്ധരുടെ പ്രാഥമിക നിഗമനം. ഈ ശ്രമം പരാജയപ്പെട്ടതിനാലാകാം മൂര്ച്ചയുള്ള ആയുധം ഉപയോഗിച്ചു സ്വകാര്യ ഭാഗങ്ങളില് പരിക്കേല്പിച്ചതെന്നും പോലീസ് അനുമാനിക്കുന്നു.
കൊലനടന്ന ഏപ്രില് 28ന് ഉച്ചയ്ക്കു ശേഷം ഇവരുടെ വീടിന്റെ പരിസരത്തു കണ്ട യുവാവിനെക്കുറിച്ച് അയല്വാസി നല്കിയ വിവരണവും ജിഷയുടെ മാതാവ് രാജേശ്വരി (49) നല്കിയ മൊഴിയുമാണു പ്രതിയെക്കുറിച്ച് സൂചന കിട്ടാന് പോലീസിനെ സഹായിച്ചത്.
അതേസമയം പിജി വിദ്യാര്ഥിയുടെ നേതൃത്വത്തിലാണ് ജിഷയുടെ പോസ്റ്റ്മോര്ട്ടം നടത്തിയതെന്ന വാര്ത്തകള് ആശുപത്രി അധികൃതര് തള്ളി. അസോസിയേറ്റ് പ്രഫസറുടെ നേതൃത്വത്തിലാണ് നടപടികള് പൂര്ത്തിയാക്കിയതെന്നും മറിച്ചുള്ള റിപ്പോര്ട്ടുകള് തെറ്റാണെന്നും അധികൃതര് വിശദീകരിച്ചു.
Top