കൊച്ചി:കോവളത്ത് നിന്നും കാണാതായ വിദേശവനിത ലിഗയെ മല്‍പിടിത്തത്തിനിടെ കൊലപ്പെടുത്തി മരത്തില്‍ കെട്ടിത്തൂക്കുകയായിരുന്നെന്നു പ്രത്യേകാന്വേഷണസംഘം. കോവളം വാഴമുട്ടത്തെ കണ്ടല്‍ക്കാട്ടില്‍ രണ്ടു യുവാക്കളും ലിഗയും തമ്മില്‍ മല്‍പിടിത്തമുണ്ടായതായും കൊലപാതകശേഷം വള്ളികൊണ്ടു കുരുക്കിട്ട് ആറടിപൊക്കമുള്ള മരത്തില്‍ കെട്ടിത്തൂക്കിയെന്നുമാണു നിഗമനം.
വള്ളിക്കുരുക്കില്‍നിന്നു മുടിനാര്‌ കണ്ടെത്തി. മൃതദേഹത്തില്‍ അടിവസ്‌ത്രങ്ങളില്ലായിരുന്നു. ലെഗിന്‍സും ടീഷര്‍ട്ടുമായിരുന്നു വേഷം. ആത്മഹത്യയെന്നു വരുത്തിത്തീര്‍ക്കാനാണു മരത്തില്‍ കെട്ടിത്തൂക്കിയത്‌. പിന്നീടു മൃതദേഹം ജീര്‍ണിച്ച്‌, തലയറ്റു താഴെവീഴുകയായിരുന്നു. ലിഗയും മറ്റു രണ്ടുപേരും സഞ്ചരിച്ചതെന്നു സംശയിക്കുന്ന ഫൈബര്‍ ബോട്ട്‌ പോലീസ് കസ്‌റ്റഡിയിലെടുത്തു. ഇതില്‍നിന്നു വിരലടയാളവിദഗ്‌ധര്‍ തെളിവുകള്‍ ശേഖരിച്ചു.
വിഷാദരോഗത്തിനു ചികിത്സയിലിരിക്കേ തിരുവനന്തപുരം പോത്തന്‍കോട്‌ ആശുപത്രിയില്‍നിന്ന്‌ ഇറങ്ങിയ ലിഗ, നേരേ കോവളത്തേക്കാണു പോയത്. അവിടെ ലിഗയുമായി സൗഹൃദം സ്‌ഥാപിച്ച യുവാക്കള്‍ ബോട്ട്‌ യാത്രയ്‌ക്കു പ്രേരിപ്പിച്ചു കൂട്ടിക്കൊണ്ടുപോയതാകാമെന്നു പോലീസ് സംശയിക്കുന്നു. വാഴമുട്ടത്തെ കണ്ടല്‍ക്കാട്ടിനുള്ളില്‍ ഉപദ്രവിക്കാന്‍ നടത്തിയ ശ്രമം ലിഗ ചെറുത്തതാകാം കൊലപാതകത്തില്‍ കലാശിച്ചതെന്നാണു സൂചന. ഫോറന്സിക് പരിശോധനയുടെ സൂചനപ്രകാരം അന്വേഷണം പുരോഗമിക്കുകയാണെന്നു സിറ്റി പോലീസ് കമ്മിഷണര്‍ പി. പ്രകാശ്‌ പറഞ്ഞു ലിഗയെ ആളൊഴിഞ്ഞ തുരുത്തില്‍ എത്തിച്ചതായി സംശയിക്കുന്ന രണ്ടുപേരെ കേന്ദ്രീകരിച്ചാണ്‌ അന്വേഷണം. എന്നാല്‍, പുരുഷ ലൈംഗികത്തൊഴിലാളിയല്ല കൊലനടത്തിയതെന്നും അന്വേഷണസംഘം വ്യക്‌തമാക്കി. ഇന്ന് പോസ്റ്റ്മോര്ട്ടം റിപ്പോര്ട്ട് ലഭിക്കുന്നതോടെ അന്വേഷണം നിര്‍ണായകഘട്ടത്തിലെത്തും. ലിഗയുടെ കൊലപാതകത്തില്‍ ലഹരിമരുന്ന്‌ സംഘങ്ങള്‍ക്കു പങ്കുണ്ടെന്നു പോലീസ് സംശയിക്കുന്നു. മൃതദേഹം കണ്ടെത്തിയ സ്‌ഥലം ലഹരിസംഘങ്ങളുടെ താവളമായിരുന്നെന്നു പ്രദേശവാസിയായ തോണിക്കാരന്‍ വെളിപ്പെടുത്തി. മൃതദേഹം കണ്ടെത്തിയതിന്റെ അടുത്തദിവസം മുതല്‍ പലരും ഒളിവില്‍പോയിട്ടുണ്ട്‌.
അതേസമയം കഴിഞ്ഞ ദിവസം കസ്റ്റഡിയില്‍ എടുത്ത പനത്തുറ സ്വദേശിയായ ലൈംഗിക തൊഴിലാളിയല്ല ലിഗയെ കൊലപ്പെടുത്തിയതെന്നാണ് പോലീസ് ഇപ്പോള്‍ പറയുന്നത്.ലിഗയുടെ മൃതദേഹത്തില്‍ അടിവസ്ത്രങ്ങള്‍ ഉണ്ടായിരുന്നില്ല. ലെഗിന്‍സും ടീഷര്‍ട്ടുമായിരുന്നു മൃതദേഹത്തില്‍ നിന്ന് കണ്ടെടുത്ത വസ്ത്രം. മൃതദേഹത്തില്‍ നിന്ന് കണ്ടെടുത്ത ഓവര്‍കോട്ടിന്‍റെ ഉടമയെ കണ്ടെത്താന്‍ ആകാത്തതും പോലീസിന് തലവേദന സൃഷ്ടിക്കുന്നുണ്ട്. കഴുത്ത് ഞെരിച്ച് ശ്വാസം മുട്ടിച്ചാണ് ലിഗയെ കൊന്നതെന്ന് ഫോറന്സിക് റിപ്പോര്ട്ട് വന്നെങ്കിലും ലിഗ ലൈംഗിക പീഡനത്തിന് ഇരയായിട്ടില്ലെന്നാണ് പോലീസ് പറയുന്നത്. നേരത്തേ ലിഗയുടെ കഴുത്തിലെ ഞരമ്പുകള്‍ പൊട്ടിയതായും കഴുത്തില്‍ പാടുള്ളതായും ഫോറന്സിക് റിപ്പോര്ട്ട് പുറത്തുവന്നിട്ടുണ്ട്. മല്‍പ്പിടിത്തത്തിനിടയിലാകാം ഇത് സംഭവിച്ചതെന്നാണ് പോലീസ് കണക്കാക്കുന്നത്.
ഫോറന്സിക് പരിശോധനയില്‍ ഇന്നലെ ത്വക്കിന്‍റെ ഭാഗങ്ങളും തലമുടികളും കണ്ടല്‍ക്കാടുകള്‍ക്കുള്ളിലെ വള്ളിപ്പടര്‍പ്പില്‍ നിന്ന് കണ്ടെത്തിയിട്ടുണ്ട്. ഇത് ലിഗയുടേതാണോ അതോ ലിഗയെ കൊലപ്പെടുത്തിയ ആളുടേതാണോ എന്ന കാര്യത്തില്‍ സ്ഥിരീകരണം വരേണ്ടതുണ്ട്.ഫോറന്സിക് പരിശോധനയില്‍ ചുറ്റിപ്പിണഞ്ഞ കാട്ടുവള്ളികള്‍ കണ്ടെത്തിയിരുന്നു. ലിഗയെ രണ്ട് യുവാക്കള്‍ ചേര്‍ന്ന് ഇവിടെ കൂട്ടികൊണ്ട് വന്ന ശേഷം ഇവരെ പീഡിപ്പിക്കാന്‍ ശ്രമിച്ചു. ഇതിനിടെ മൂന്ന് പേരും കൂടി മല്‍പ്പിടിത്തം ഉണ്ടായതാകാമെന്നും അതിനിടെ വള്ളിപ്പടര്‍പ്പ് കൊണ്ട് കുരുക്കിട്ട് ലിഗയെ കൊലപ്പെടുത്തിയെന്നുമാണ് പോലീസിന്‍റെ നിഗമനം. എന്നാല്‍ ആത്മഹത്യയെന്ന് വരുത്തി തീര്‍ക്കാന്‍ ആറടി പൊക്കത്തില്‍ വള്ളികൊണ്ട് കെട്ടി തൂക്കിയതാകാം എന്നും പോലീസ് സംശയിക്കുന്നു.
Top