തിരുവനന്തപുരം: കെ.പി.സി.സി.യുടെ പുതിയ നേതൃത്വത്തെക്കുറിച്ചുള്ള ചർച്ചകൾ കോൺഗ്രസ് വൃത്തങ്ങളിൽ സജീവമാകുന്നതിനിടെ, ഡോ. മാത്യു കുഴൽനാടനെ പ്രസിഡന്റായും ഷാഫി പറമ്പിൽ, വി.പി. സജീന്ദ്രൻ, സി.ആർ. മഹേഷ് എന്നിവരെ വർക്കിങ് പ്രസിഡന്റുമാരായും പരിഗണിക്കുന്നുവെന്ന അഭ്യൂഹങ്ങൾ ശക്തമാകുന്നു.
ഈ നേതൃത്വസമവാക്യം യാഥാർഥ്യമായാൽ, യുവമുഖങ്ങൾക്കും സംഘടനാപരിചയമുള്ള നേതാക്കൾക്കും ഒരുപോലെ പ്രാതിനിധ്യം നൽകുന്ന പുനഃസംഘടനയായി ഇത് വിലയിരുത്തപ്പെടാൻ സാധ്യതയുണ്ടെന്നാണ് രാഷ്ട്രീയ നിരീക്ഷകരുടെ അഭിപ്രായം.
കെ.പി.സി.സി അധ്യക്ഷനെ തീരുമാനിക്കുന്നതുമായി ബന്ധപ്പെട്ട ചർച്ചകൾ സജീവമാകുന്നതിനിടെ, പുതിയ നേതൃത്വത്തെക്കുറിച്ച് പാർട്ടിക്കുള്ളിൽ ധാരണ രൂപപ്പെടുന്നതായാണ് സൂചന. യുവാക്കൾക്ക് കൂടുതൽ പ്രാതിനിധ്യം നൽകണമെന്ന ആവശ്യം നേതൃത്വത്തിൽ ശക്തമായതായാണ് വിവരം. 50 വയസ്സിന് താഴെയുള്ള നേതാവിനെ കെ.പി.സി.സി അധ്യക്ഷ സ്ഥാനത്തേക്ക് പരിഗണിക്കണമെന്ന പ്രത്യേക താൽപര്യം രാഹുൽ ഗാന്ധിക്കുണ്ടെന്നാണ് പാർട്ടി വൃത്തങ്ങളിൽനിന്നുള്ള സൂചന. ഇതിന്റെ ഭാഗമായി മൂവാറ്റുപുഴ എം.എൽ.എയും കെ.പി.സി.സി വൈസ് പ്രസിഡന്റുമായ ഡോ. മാത്യു കുഴൽനാടന്റെ പേര് അധ്യക്ഷ സ്ഥാനത്തേക്ക് സജീവമായി പരിഗണിക്കുന്നതായാണ് വിവരം.
ഷാഫി പറമ്പിൽ, വി.പി. സജീന്ദ്രൻ, സി.ആർ. മഹേഷ് എന്നിവരെ വർക്കിങ് പ്രസിഡന്റുമാരായി പരിഗണിക്കുന്നതായും രാഷ്ട്രീയ വൃത്തങ്ങളിൽനിന്ന് സൂചനയുണ്ട്. യുവതലമുറയുടെ പ്രതിനിധികൾക്കൊപ്പം സംഘടനാ പരിചയമുള്ള നേതാക്കളെയും ഉൾപ്പെടുത്തി കെ.പി.സി.സി നേതൃത്വത്തെ പുനഃസംഘടിപ്പിക്കാനാണ് നീക്കമെന്നാണ് വിലയിരുത്തൽ.
മാത്യു കുഴൽനാടന്റെ പേരിന് ദേശീയ നേതൃത്വത്തിലെ ചില പ്രമുഖരുടെ പിന്തുണയുണ്ടെന്നാണ് ബന്ധപ്പെട്ട വൃത്തങ്ങളുടെ അവകാശവാദം. മുതിർന്ന കോൺഗ്രസ് നേതാവും കോൺഗ്രസ് വർക്കിങ് കമ്മിറ്റി അംഗവുമായ എ.കെ. ആന്റണിയുടെ താൽപര്യവും കുഴൽനാടന്റെ പേരിന് അനുകൂലമാണെന്നാണ് സൂചന. നേരത്തെ കോൺഗ്രസ് വർക്കിങ് കമ്മിറ്റിയിലേക്കുള്ള പരിഗണനയിൽ, തനിക്ക് പകരം മാത്യു കുഴൽനാടനെ പരിഗണിക്കണമെന്ന ആവശ്യം എ.കെ. ആന്റണി മുന്നോട്ടുവച്ചിരുന്നതായും പാർട്ടി വൃത്തങ്ങൾ ചൂണ്ടിക്കാട്ടുന്നു.
ജെൻസി തലമുറയുൾപ്പെടെയുള്ള യുവതലമുറയ്ക്കിടയിലെ സ്വീകാര്യത, പ്രൊഫഷണൽ പശ്ചാത്തലം, നിയമസഭയിലെ സജീവ ഇടപെടലുകൾ, സംഘടനാ രംഗത്തെ പ്രവർത്തന പരിചയം എന്നിവയാണ് മാത്യു കുഴൽനാടന് അനുകൂലമായി ചൂണ്ടിക്കാണിക്കപ്പെടുന്ന ഘടകങ്ങൾ. ക്രൈസ്തവ സമൂഹത്തിൽ നിന്നുള്ള യുവ നേതാവെന്ന പരിഗണനയും നേതൃത്വ ചർച്ചകളിൽ പ്രസക്തമാകുന്നുണ്ടെന്നാണ് വിവരം.
അതേസമയം, യൂത്ത് കോൺഗ്രസിന്റെയും കെ.എസ്.യുവിന്റെയും പുനഃസംഘടനയും ഉടൻ ഉണ്ടായേക്കുമെന്നാണ് പാർട്ടി വൃത്തങ്ങളിൽനിന്നുള്ള സൂചന. കെ.പി.സി.സി നേതൃത്വത്തിലെ മാറ്റത്തിനൊപ്പം യുവജന സംഘടനകളിലും തലമുറമാറ്റം കൊണ്ടുവരാനുള്ള നീക്കങ്ങൾ ഉണ്ടാകുമെന്നാണ് വിലയിരുത്തൽ.
Top