കൊച്ചി :തിരുവിതാംകൂര് ദേവസ്വം ബോര്ഡ് പ്രസിഡന്റ് പി എസ് പ്രശാന്തിന്റെ കാലാവധി നീട്ടില്ല.പ്രസിഡൻ്റ് സ്ഥാനത്ത് നിന്ന് പി എസ് പ്രശാന്തിനെ മാറ്റും. മുൻ എംപി എ സമ്പത്തിനെയാണ് ദേവസ്വം ബോർഡ് പ്രസിഡൻ്റ് സ്ഥാനത്തേക്ക് പരിഗണിക്കുന്നത്. ഇക്കാര്യത്തില് സിപിഐഎം നേതൃത്വം തീരുമാനമെടുത്തതായാണ് പുറത്തുവരുന്ന വിവരം. കെ രാധാകൃഷ്ണൻ ദേവസ്വം മന്ത്രിയായിരുന്ന കാലത്ത് അദ്ദേഹത്തിൻ്റെ പിഎയായിരുന്നു എ സമ്പത്ത്. നാളെ ചേരുന്ന സിപിഐഎം സംസ്ഥാന സെക്രട്ടേറിയറ്റിലാകും അന്തിമ തീരുമാനം. പി എസ് പ്രശാന്തിനൊപ്പം സിപിഐ പ്രതിനിധി എ അജികുമാറും പുറത്തേക്ക്.
ദേവസ്വം ബോർഡിലെ സിപിഐ പ്രതിനിധിയായി വിളപ്പില് രാധാകൃഷ്ണനെ പരിഗണിക്കുന്നതായും വിവരമുണ്ട്. സിപിഐ സംസ്ഥാന കൗണ്സില് അംഗവും തിരുവനന്തപുരം ജില്ല പഞ്ചായത്ത് ക്ഷേമകാര്യ സ്ഥിരം സമിതി അധ്യക്ഷനുമാണ് വിളപ്പില് രാധാകൃഷ്ണന്. അടുത്ത മന്ത്രിസഭാ യോഗത്തില് പുതിയ ഭരണസമിതിയെ നിശ്ചയിക്കും. നിലവിലുള്ള ഭരണസമിതിയുടെ അവസാന യോഗം പതിനൊന്നാം തീയതി ചേരും.
സ്വര്ണപ്പാളി വിവാദമടക്കം നിലനില്ക്കുന്ന സാഹചര്യത്തിലാണ് പി എസ് പ്രശാന്ത് അടക്കമുള്ള നിലവിലെ ഭരണസമിതിക്ക് തുടര്ഭരണം നല്കേണ്ടതില്ല എന്ന തീരുമാനമെടുത്തിരിക്കുന്നത്. ഓഡിനന്സ് ഇറക്കി ഒരു വര്ഷം കൂടി ഇതേ ഭരണ സമിതി തുടരട്ടെ എന്നായിരുന്നു രണ്ട് ദിവസങ്ങള്ക്ക് മുന്പ് വരെ സര്ക്കാരിന്റെയും സിപിഐയുടെയും തീരുമാനം. എന്നാല് ഇന്നലെ ഹൈക്കോടതിയില് സമര്പ്പിച്ച ഇടക്കാല റിപ്പോര്ട്ടില് നിലവിലെ ഭരണസമിതിയെ കൂടി പ്രതി സ്ഥാനത്ത് കാണുന്ന സാഹചര്യമുണ്ടായിരുന്നു. തദ്ദേശ തെരഞ്ഞെടുപ്പ് കൂടി വരാനിരിക്കുന്നതിനാല് ഈ ഭരണസമിതിയെ നിലനിര്ത്തുന്നത് ശരിയല്ലെന്ന തീരുമാനമാണ് സിപിഐഎം സ്വീകരിച്ചത് എന്നാണ് പുറത്തുവരുന്ന സൂചന
മണ്ഡലകാലം ആരംഭിക്കുന്ന സാഹചര്യത്തില് പുതിയ ഭരണസമിതി വന്നാല് ഏകോപന പ്രവര്ത്തനങ്ങളെ ബാധിക്കുമെന്ന് ചൂണ്ടിക്കാണിച്ചുകൊണ്ട് പിഎസ് പ്രശാന്തിനും അജികുമാറിനും കാലാവധി നീട്ടി നല്കാനുള്ള നീക്കം നടന്നിരുന്നു. ഓര്ഡിനന്സ് ഇറക്കിക്കൊണ്ട് കാലാവധി നീട്ടി നല്കാനുള്ള നീക്കം നടക്കുന്നതിനിടെയാണ് സ്വര്ണക്കൊള്ളയുമായി ബന്ധപ്പെട്ട വിവിധ വിവരങ്ങള് പുറത്ത് വരുന്നത്. നിലവിലുള്ള ദേവസ്വം ബോര്ഡിനെയും കുറ്റക്കാരാക്കിക്കൊണ്ട് ഒന്നാം ഇടക്കാല റിപ്പോര്ട്ടില് ചില നിരീക്ഷണങ്ങള് ഹൈക്കോടതി നടത്തിയിരുന്നു. ഇതോടെയാണ് കാലാവധി നീട്ടി നല്കിയാല് മറ്റ് രാഷ്ട്രീയ ഭവിഷ്യത്തുകള് ഉണ്ടാക്കുമെന്ന് നേതാക്കള് വിലയിരുത്തിയത്.
ഇക്കാര്യം സിപിഐയെയും അറിയിച്ചിട്ടുണ്ട്. വിളപ്പില് രാധാകൃഷ്ണന് സിപിഐയുടെ പ്രതിനിധിയായി ദേവസ്വം ബോര്ഡ് അംഗമാകുമെന്നാണ് വിവരം. ഇതോടെ പുതിയ ദേവസ്വം ബോര്ഡ് പ്രസിഡന്റ് ഈഴവ വിഭാഗത്തില് നിന്നാകുമെന്ന് ഉറപ്പായി.
ശബരിമല സ്വര്ണ്ണക്കൊള്ളയില് നിലവിലെ ദേവസ്വം ബോര്ഡിനെ സംശയ നിഴലില് നിര്ത്തുന്ന പരാമര്ശങ്ങള് ഹൈകോടതിയുടെ ഭാഗത്ത് ഇന്നലെയും ഉണ്ടായിരുന്നു. നിലവിലെ ഭരണസമിതിയുടെ മിനിറ്റ്സില് ഗുരുതര ക്രമക്കേടുകള് എന്ന് കണ്ടെത്തല്. 2025ല് കോടതി അനുമതി തേടാതെ ദ്വാരപാലകപാളി ഉണ്ണികൃഷ്ണന് പോറ്റിയ്ക്ക് കൊടുത്തുവിട്ടത് 2019 ലെ ക്രമകേട് മറച്ചുവെക്കാനെന്നും ഹൈകോടതി പറഞ്ഞു. പ്രത്യേക അന്വേഷണ സംഘത്തിന്റെ റിപ്പോര്ട്ട് പരിശോധിച്ചതിന് പിന്നാലെയായിരുന്നു കോടതിയുടെ വിമര്ശനം.
Top