ഒമാനില്‍ മരിച്ച പ്രവാസിയുടെ മൃതദേഹം ബീച്ചില്‍ ചാക്കില്‍ കെട്ടിയ നിലയില്‍; ചാക്കിലാക്കി ഉപേക്ഷിക്കാന്‍ പറഞ്ഞത് ജോത്സ്യന്‍

പരവൂര്‍: വര്‍ഷങ്ങള്‍ക്ക് മുമ്പ് മരിച്ച പ്രവാസിയുടെ മൃതദേഹം തെക്കുംഭാഗം കാപ്പില്‍ ബീച്ചില്‍ ചാക്കില്‍ കെട്ടി ഉപേക്ഷിച്ച നിലയില്‍. ചാക്കിലാക്കി ഉപേക്ഷിച്ച നിലയില്‍ കണ്ടെത്തിയ മൃതദേഹാവശിഷ്ടം വര്‍ഷങ്ങള്‍ക്ക് മുമ്പ് ഒമാനില്‍ ഹൃദയാഘാതം മൂലം മരിച്ച പ്രവാസി കൊല്ലം കരിക്കോട് സ്വദേശി സോമന്‍ സുരലാലിന്റേതാണെന്ന് തിരിച്ചറിഞ്ഞു. പരവൂര്‍ പൊലീസ് ആണ് സംഭവം അന്വേഷിക്കുന്നത്.

2003 ല്‍ ഒമാനില്‍ മരിച്ച സുരലാലിന്റെ മൃതദേഹം കൊല്ലത്ത് കൊണ്ടുവന്ന് സംസ്‌കരിക്കുകയായിരുന്നു. എന്നാല്‍ കഴിഞ്ഞദിവസം ബന്ധുക്കള്‍ വീട് നിര്‍മ്മിക്കാന്‍ പുരയിടം വൃത്തിയാക്കുന്നതിനിടെ മൃതദേഹാവശിഷ്ടം പൊന്തി വരികയായിരുന്നു. ഈ വിഷയം ബന്ധുക്കള്‍ ജോത്സ്യനെ ധരിപ്പിച്ചു. തുടര്‍ന്ന് ജോത്സ്യന്റെ നിര്‍ദ്ദേശപ്രകാരം അവശിഷ്ടം ചാക്കിലാക്കി തിങ്കളാഴ്ച രാത്രി കടലില്‍ ഒഴുക്കാന്‍ കൊണ്ടുവരികയും ഈ സമയം സമീപത്ത് ആളുകളെ കണ്ടതിനാല്‍ ചാക്ക് കെട്ട് കടല്‍തീരത്ത് ഉപേക്ഷിക്കുകയുമായിരുന്നു.

മാസങ്ങള്‍ പഴക്കമുള്ള ജീര്‍ണിച്ച മൃതദേഹം ചാക്കില്‍ കെട്ടി ഉപേക്ഷിച്ച നിലയില്‍ കണ്ടെത്തിയത് ദുരൂഹത ഉണര്‍ത്തിയിരുന്നു. സംഭവം വാര്‍ത്തയായതോടെ ബന്ധുക്കള്‍ തന്നെയാണ് വിവരം പൊലീസിനോട് തുറന്നു പറഞ്ഞത്. ഇവര്‍ക്കെതിരെ മൃതദേഹത്തോട് അനാദരവ് കാട്ടിയതിന് പരവൂര്‍ പൊലീസം കേസെടുത്തു.

Top