പതിനാല് വര്‍ഷം മുമ്പ് മരണത്തെ മുഖാമുഖം കണ്ട ഞെട്ടലില്‍ നിന്നും ഇനിയും ബോളിവുഡ് നടി പ്രീതി സിന്റ മോചിതയായിട്ടില്ല. ഇന്തോനേഷ്യയില്‍ വീണ്ടും സുനാമി ദുരിതം വിതയ്ക്കുമ്പോള്‍ താന്‍ രക്ഷപ്പെട്ടത് ഓര്‍ക്കുകയാണ് അവര്‍. പതിനാല് വര്‍ഷം മുമ്പ് 2004 ഡിസംബര്‍ 26-ന് ഫുക്കറ്റില്‍ സുഹൃത്തുക്കള്‍ക്കൊപ്പം അവധിക്കാലം ആഘോഷിക്കുന്നതിനിടയിലാണ് പ്രീതിയും കൂട്ടുകാരും മരണത്തെ കണ്‍മുന്നില്‍ കണ്ടത്.
അന്ന് ഇന്ത്യന്‍ മഹാസമുദ്രത്തിന്റെ തീരപ്രദേശങ്ങളിലേക്ക് ആഞ്ഞടിച്ച സുനാമിയില്‍ 14 രാജ്യങ്ങളിലായി പൊലിഞ്ഞത് ലക്ഷക്കണക്കിന് ജീവനുകളാണ്. ആ മരണങ്ങളില്‍ ഒന്ന് തന്റേതുമാവുമായിരുന്നു എന്നാണ് നടി പറയുന്നത്. ഇന്ത്യ ടുഡേ ഈസ്റ്റ് കോണ്‍ക്ലേവ് 2018 നിടെയാണ് തന്റെ അനുഭവം പ്രീതി പങ്കുവച്ചത്.
അന്ന് സംഭവിച്ചതിനെക്കുറിച്ച് നടി പറയുന്നതിങ്ങനെ: ഞങ്ങള്‍ അന്ന് ഫുക്കെറ്റിലായിരുന്നു. അപ്രതീക്ഷിതമായി വന്ന സുനാമിയില്‍ എന്റെ അടുത്ത സുഹൃത്തുക്കളില്‍ പലരും മരണപ്പെട്ടു. ഞാന്‍ മാത്രമാണ് അക്കൂട്ടത്തില്‍ നിന്നും തലനാരിഴയ്ക്ക് രക്ഷപ്പെട്ടത്. വല്ലാത്തൊരു അനുഭവമായിരുന്നു അത്. ആ ഭയപ്പെടുത്തുന്ന സംഭവമാണ് തന്റെ ജീവിതത്തില്‍ വഴിത്തിരിവായി മാറിയതെന്നും പ്രീതി കൂട്ടിചേര്‍ത്തു. ജീവിതത്തില്‍ ചെയ്യാന്‍ ആഗ്രഹമുള്ള കാര്യങ്ങള്‍ എല്ലാം ചെയ്യണമെന്ന ചിന്ത ഉണ്ടായത് അപ്പോള്‍ മുതലാണെന്നും ഇന്ത്യന്‍ പ്രീമിയര്‍ ലീഗിലേക്ക് വരാന്‍ പ്രചോദനമായതു പോലും ആ സംഭവമാണെന്നും പ്രീതി വെളിപ്പെടുത്തി.
Top