ഐഎന്‍എക്സ് മീഡിയ അഴിമതിക്കേസില്‍ മുന്‍ കേന്ദ്രമന്ത്രി പി. ചിദംബരത്തെ പിന്തുണച്ച് എഐസിസി ജനറല്‍ സെക്രട്ടറി പ്രിയങ്ക ഗാന്ധി. രാജ്യസഭയിലെ അങ്ങേയറ്റം യോഗ്യതയുള്ള ആദരണീയനായ അദ്ദേഹത്തെ നാണംകെട്ട ഭീരുക്കള്‍ വേട്ടയാടുന്നുവെന്നാണ് പ്രിയങ്കയുടെ പ്രതികരണം. ട്വിറ്ററിലൂടെയായിരുന്നു പ്രിയങ്ക തന്‍റെ നിലപാട് അറിയിച്ചത്. സത്യത്തിനായി പോരാടുന്നത് തുടരുമെന്നും പ്രിയങ്ക ട്വിറ്ററില്‍ കുറിച്ചു.
ഡല്‍ഹി ഹൈക്കോടതി മുന്‍കൂര്‍ ജാമ്യാപേക്ഷ തള്ളിയതിനെ തുടര്ന്ന് കേസില്‍ ചിദംബരത്തെ സിബിഐ അറസ്റ്റ് ചെയ്തേക്കുമെന്നാണ് റിപ്പോര്‍ട്ട്. ഇന്നലെ അര്‍ധരാത്രിയില്‍ മൂന്നുതവണ ചിദംബരത്തിന്‍റെ വസതിയില്‍ സിബിഐ സംഘമെത്തിയെങ്കിലും ചിദംബരം വീട്ടില്‍ ഇല്ലാതിരുന്നതിനെ തുടര്ന്ന് അറസ്റ്റ് ചെയ്യാനാകാതെ മടങ്ങുകയായിരുന്നു. സിബിഐ സംഘം മടങ്ങിയതിനു പിന്നാലെ എന്‍ഫോഴ്സ്മെന്‍റ് ഡയറക്ടറേറ്റ് സംഘവും ചിദംബരത്തിന്‍റെ വീട്ടില്‍ എത്തിയിരുന്നു. ചിദംബരത്തെ ചോദ്യം ചെയ്യാന്‍ കസ്റ്റഡിയിലെടുക്കേണ്ടത് ആവശ്യമാണെന്ന സിബിഐ‍യുടേയും ഇ ഡിയുടേയും വാദം അംഗീകരിച്ചാണ് കോടതി ജാമ്യാപേക്ഷ തള്ളിയത്.
Top