മോദിക്കെതിരെ പ്രിയങ്ക ഗാന്ധി മത്സരിച്ചാല്‍ ഉറപ്പായും ജയിക്കും; ലോക്‌സഭാ തിരഞ്ഞെടുപ്പില്‍ ബിജെപിക്കു മത്സരം കടുക്കുമെന്നും സഞ്ജയ് റാവത്ത്

മുംബൈ : പ്രധാനമന്ത്രി നരേന്ദ്ര മോദിയുടെ മണ്ഡലമായ ഉത്തര്‍പ്രദേശിലെ വാരാണസിയില്‍ മത്സരിച്ചാല്‍ കോണ്‍ഗ്രസ് നേതാവ് പ്രിയങ്ക ഗാന്ധി ഉറപ്പായും ജയിക്കുമെന്നു ശിവസേന (ഉദ്ധവ് ബാലാസാഹേബ് താക്കറെ വിഭാഗം) നേതാവ് സഞ്ജയ് റാവത്ത്. ലോക്‌സഭാ തിരഞ്ഞെടുപ്പില്‍ ബിജെപിക്കു മത്സരം കടുക്കുമെന്നും അദ്ദേഹം പറഞ്ഞു.

‘വാരാണസിയിലെ ജനങ്ങള്‍ക്കു പ്രിയങ്ക ഗാന്ധിയെ ആവശ്യമുണ്ട്. മോദിക്കെതിരെ വാരാണസിയില്‍ മത്സരിച്ചാല്‍ തീര്‍ച്ചയായും പ്രിയങ്ക ജയിക്കും. റായ്ബറേലി, വാരാണസി, അമേഠി എന്നിവിടങ്ങളില്‍ ബിജെപിക്കു മത്സരം കടുപ്പമാകും.’- സഞ്ജയ് റാവത്ത് പറഞ്ഞു.