തിരുവനന്തപുരം: സോളാര്‍ വിഷയത്തില്‍ നിയമസഭയില്‍ അടിയന്തര പ്രമേയം അവതരിപ്പിക്കുമ്പോള്‍ മുഖ്യമന്ത്രിയേയും ഇടത് പക്ഷത്തേയും രൂക്ഷമായ ഭാഷയില്‍ ഷാഫി പറമ്പില്‍ എം.എല്‍.എ വിമര്‍ശിച്ചു. പിണറായി വിജയന് ഇരട്ട ചങ്കല്ല, ഇരട്ട മുഖമാണ് ഉള്ളതെന്നും ഉമ്മന്‍ ചാണ്ടിയോട് ആദ്യം പിണറായി വിജയന് മാപ്പ് പറയണമെന്നും ഷാഫി പറമ്പില്‍ പറഞ്ഞു.
‘സോളാര്‍ വിഷയം ഒരു രാഷ്ട്രീയ ദുരന്തമാണ്. നട്ടാല്‍ കുരുക്കാത്ത പച്ചക്കള്ളം കൊണ്ട് ഉമ്മന്‍ ചാണ്ടിയെ ക്രൂരമായി വേട്ടയാടി. അഞ്ച് കത്തുകള്‍ ഉണ്ടാക്കി നിയമസഭയില്‍ പോലും അദ്ദേഹത്തെ വേട്ടയാടി. അദ്ദേഹത്തിനെതിരെ ലൈംഗിക ആരോപണം പോലും ഉന്നയിച്ചു. മുഖ്യമന്ത്രി ആദ്യം ഉമ്മന്‍ ചാണ്ടിയോട് മാപ്പ് പറയണം. മാപ്പ് പറയാതെ പിണറായി അടക്കമുക്കമുള്ളവര്‍ സംസാരിക്കരുത്. വ്യാജ കത്തുകളില്‍ പിണറായിയുടെ പങ്ക് പുറത്ത് കൊണ്ടുവരണമെന്നും ഷാഫി പറമ്പില്‍ സഭയില്‍ പറഞ്ഞു.
വി.എസ്. അച്യുതാനന്ദനെ പോലെയുള്ളവര്‍ ഹീനമായ ഭാഷയില്‍ വ്യക്തിഹത്യ നടത്തിയെന്നും കേരളത്തില്‍ സൈബര്‍ ആക്രമണത്തിന്റെ തുടക്കം സോളാറില്‍ നിന്നാണെന്നും അദ്ദേഹം പറഞ്ഞു.
Top