കൊച്ചി: പ്രായപൂര്ത്തിയാകാത്ത പെണ്കുട്ടിയെ പീഡിപ്പിച്ച കേസില് നമ്പര് 18 ഹോട്ടല് ഉടമ റോയ് വയലാട്ട്, ഷൈജു തങ്കച്ഛന്, അഞ്ജലി എന്നിവര് നല്കിയ മുന്കൂര് ജാമ്യാപേക്ഷയില് ഹൈക്കോടതി സര്ക്കാരിന്റെ വിശദീകരണം തേടി. നേരെത്തെ മുന്കൂര് ജാമ്യാപേക്ഷ പരിഗണിച്ച കോടതി പ്രതികളുടെ അറസ്റ്റ് തടഞ്ഞിരുന്നു.
തങ്ങളെ ഭീഷണിപ്പെടുത്തി പണം കൊളളയടിക്കാനാണ് പരാതിക്കാര് ശ്രമിക്കുന്നതെന്നു വ്യക്തമാക്കിയാണ് പ്രതികള് മുന്കൂര് ജാമ്യാപേക്ഷ സമര്പ്പിച്ചത്. ഹോട്ടലിലെത്തിയ യുവതിയെയും മകളെയും ലൈംഗികമായി ഉപദ്രവിച്ചെന്നാണ് ഇവര്ക്കെതിരെയുള്ള പോലീസ് കേസ്.
മോഡലുകളുടെ അപകടമരണക്കേസിന് ശേഷം ചിലര് തന്നെ പ്രത്യേക ലക്ഷ്യത്തോടെ കേസുകളില് കുടുക്കാന് ശ്രമിക്കുകയാണെന്നും, അതിന്റെ ഭാഗമായിട്ടാണ് പുതിയ കേസെന്നും മുന്കൂര് ജാമ്യാപേക്ഷയില് പറയുന്നു.ഒരു പോലീസ് ഉദ്യോഗസ്ഥനും ഇതിനു പിന്നിലുണ്ടെന്നു ഹര്ജിയില് ആരോപണമുണ്ട്.
2021 ഒക്ടോബര് 20ന് റോയ് വയലാട്ടിന്റെ ഉടമസ്ഥതയിലുള്ള നമ്പര് 18 ഹോട്ടലില് വെച്ചാണ് ലൈംഗികാതിക്രമമുണ്ടായതെന്നാണ് പരാതി. കോഴിക്കോട് സ്വദേശിയായ യുവതിയും ഇവരുടെ 17 വയസുള്ള മകളുമാണ് പരാതിക്കാര്. കേസില് സര്ക്കാരിന്റെ വിശദീകരണം തേടിയ ശേഷം കോടതി കേസ് പിന്നീട് പരിഗണിക്കാന് മാറ്റി.
Top