തിരുവല്ലയില് യുവാവ് തീ കൊളുത്തി കൊലപ്പെടുത്താന് ശ്രമിച്ച പെണ്ക്കുട്ടിയുടെ ആരോഗ്യനില അതീവ ഗുരുതരമായി തുടരുന്നു. കൊച്ചിയിലെ സ്വകാര്യ ആശുപത്രിയിലാണ് പെണ്കുട്ടിയെ പ്രവേശിപ്പിച്ചിരിക്കുന്നത്. പെണ്കുട്ടിയുടെ ആരോഗ്യ നിലയില് പുരോഗതി ഇല്ലെന്നും വെന്റിലേറ്ററില് നിന്ന് മാറ്റാന് കഴിയാത്ത അവസ്ഥയിലാണെന്നും ആശുപത്രി അധികൃതര് അറിയിച്ചു. കഴിഞ്ഞ ദിവസം തിരുവല്ലയില് വച്ചാണ് വിവാഹാഭ്യര്ത്ഥന നടത്തിയ ആളുടെ ആക്രമണത്തിന് പെണ്കുട്ടി ഇരയായത്. പ്രതി അജിന് ജെറി പെണ്കുട്ടിയെ നിരന്തരമായി ഫോണില് വിളിച്ച് ശല്യം ചെയ്തിരുന്നുവെന്ന് അമ്മാവന് സന്തോഷ് പറഞ്ഞിരുന്നു. ഇതോടെ പെണ് കുട്ടിയുടെ അച്ഛന്റെ ഫോണില് വിളിച്ചും പെണ്കുട്ടിയെ പറ്റി അന്വേഷിച്ചിരുന്നു.നഗരത്തിലെ ഒരു സ്വകാര്യ വിദ്യാഭ്യാസ സ്ഥാപനത്തില് ബിഎസ്സി വിദ്യാര്ത്ഥിനിയായ പെണ്കുട്ടിയെ ക്ലാസ്സിലേക്ക് പോകും വഴിയാണ് യുവാവ് ആക്രമിച്ചത്. പ്ലസ് ടുവിന് പഠിക്കുമ്പോള് മുതല് അജിന് റെജി മാത്യുവിന് പെണ്കുട്ടിയോട് പ്രണയമുണ്ടായിരുന്നു. എന്നാല് അജിനോട് പെണ്കുട്ടി ഒരു ഘട്ടത്തിലും താത്പര്യം കാണിച്ചിരുന്നില്ല. പലവട്ടം യുവാവ് വിവാഹഭ്യര്ത്ഥന നടത്തിയെങ്കിലും പെണ്കുട്ടി ഇതെല്ലാം നിരസിച്ചു. ഇതില് പ്രകോപിതനായാണ് യുവാവ് ക്രൂരമായി പ്രതികാരം ചെയ്തത്.
തിരുവല്ലയില് പൊള്ളലേറ്റ പെണ്ക്കുട്ടിയുടെ ആരോഗ്യനില അതീവ ഗുരുതരം; വെന്റിലേറ്ററില് നിന്ന് മാറ്റാന് കഴിയില്ല
Tags: thiruvalla case