കേരള നിയമസഭാ തിരഞ്ഞെടുപ്പിൽ യു.ഡി.എഫ് അധികാരമുറപ്പിച്ച പശ്ചാത്തലത്തിൽ മുസ്ലിം ലീഗ് ക്യാമ്പുകളിൽ ഭരണപങ്കാളിത്തത്തെക്കുറിച്ചുള്ള ആലോചനകൾ സജീവമാകുകയാണ്. മുന്നണിയിലെ രണ്ടാമത്തെ വലിയ കക്ഷിയെന്ന നിലയിൽ അർഹമായ പ്രാധാന്യം ഭരണത്തിൽ നേടിയെടുക്കുകയാണ് ലീഗിന്റെ ലക്ഷ്യം. ഇതിൽ ഏറ്റവും ശ്രദ്ധേയമായ ചർച്ച പി.കെ. കുഞ്ഞാലിക്കുട്ടിയുടെ ഉപമുഖ്യമന്ത്രി പദവിയെക്കുറിച്ചുള്ളതാണ്. പാർട്ടി നേരിട്ട് ഈ ആവശ്യം ഉന്നയിച്ച് മുന്നണിയിൽ സമ്മർദ്ദം ചെലുത്തില്ലെങ്കിലും ഭരണത്തിന്റെ സുഗമമായ നടത്തിപ്പിന് കുഞ്ഞാലിക്കുട്ടിയെപ്പോലൊരു നേതാവ് ഉപമുഖ്യമന്ത്രിയാകുന്നത് ഗുണകരമാകുമെന്ന് യു.ഡി.എഫ് നേതൃത്വവും കരുതുന്നു. കുഞ്ഞാലിക്കുട്ടിയുടെ ദീർഘകാലത്തെ രാഷ്ട്രീയ പരിചയസമ്പത്തും മുന്നണിയിലെ സ്വീകാര്യതയും ഈ സാധ്യത വർധിപ്പിക്കുന്നു.
മന്ത്രിസ്ഥാനങ്ങളുടെ കാര്യത്തിലും ലീഗ് വ്യക്തമായ ധാരണയോടെയാണ് നീങ്ങുന്നത്. അഞ്ച് മന്ത്രിസ്ഥാനങ്ങൾ പാർട്ടി ഉറപ്പിക്കുന്നുണ്ടെങ്കിലും സാഹചര്യങ്ങൾ അനുകൂലമാണെങ്കിൽ ആറ് സീറ്റുകൾ വരെ ലീഗ് പ്രതീക്ഷിക്കുന്നുണ്ട്. എന്നാൽ ആറാം മന്ത്രിസ്ഥാനത്തിന് വേണ്ടി അമിതമായ സമ്മർദ്ദം ചെലുത്തി മുന്നണിയിൽ അസ്വാരസ്യങ്ങൾ ഉണ്ടാക്കേണ്ടതില്ലെന്നാണ് പൊതുവായ തീരുമാനം. മന്ത്രിസഭയിലേക്ക് പി.കെ. കുഞ്ഞാലിക്കുട്ടിയെ കൂടാതെ ആബിദ് ഹുസൈൻ തങ്ങൾ, പാറക്കൽ അബ്ദുള്ള, എൻ. ഷംസുദ്ധീൻ, എ.കെ.എം. അഷ്റഫ് തുടങ്ങിയ പ്രമുഖരുടെ പേരുകളാണ് മുൻനിരയിലുള്ളത്. ഇതിനുപുറമെ കെ.എം. ഷാജി, പി.കെ. ബഷീർ, ടി.വി. ഇബ്രാഹിം, കുറുക്കോളി മൊയ്ദീൻ, മഞ്ഞളാംകുഴി അലി എന്നിവരെയും സജീവമായി പരിഗണിക്കുന്നുണ്ട്.
ഇത്തവണ ലീഗ് മന്ത്രിസഭയിൽ വനിതാ പ്രാതിനിധ്യം വേണമെന്ന ആവശ്യത്തിന് പാർട്ടിയിൽ വലിയ പിന്തുണ ലഭിക്കുന്നുണ്ട്. ഫാത്തിമ തെഹലിയ, ജയന്തി രാജൻ എന്നിവരിൽ ആരെങ്കിലും തിരഞ്ഞെടുക്കപ്പെട്ടാൽ അവർക്ക് മന്ത്രിസ്ഥാനം നൽകുന്നത് പാർട്ടിയുടെ പ്രതിച്ഛായയ്ക്ക് പുതിയ ഊർജ്ജം നൽകുമെന്നാണ് വിലയിരുത്തപ്പെടുന്നത്. മത്സരിച്ച ഏകദേശം 23 സീറ്റുകളിലും വിജയിക്കാനാവുമെന്ന ഉറച്ച ആത്മവിശ്വാസത്തിലാണ് ലീഗ് നേതൃത്വം. വരും ദിവസങ്ങളിൽ നടക്കുന്ന യു.ഡി.എഫ് ഉന്നതതല യോഗങ്ങളോടെ ഭരണത്തിലെ പദവികളെ സംബന്ധിച്ച കൃത്യമായ ചിത്രം തെളിയും.
Top