കോഴിക്കോട്: കുതിരവട്ടം മാനസികാരോഗ്യകേന്ദ്രത്തില് യുവതിയെ മരിച്ച നിലയില് കണ്ടെത്തിയ സംഭവത്തില് കൊലപാതകമെന്ന് പോസ്റ്റ്മോര്ട്ടം റിപ്പോര്ട്ട്. ശ്വാസം മുട്ടിച്ചാണ് മരണമെന്ന് പോസ്റ്റ്മോര്ട്ടത്തില് കണ്ടെത്തി. മാനസികാരോഗ്യ കേന്ദ്രത്തിലെ തന്നെ മറ്റൊരു അന്തേവാസിയാണ് കൊല നടത്തിയതെന്ന് പോലീസ് പറഞ്ഞു.
കുതിരവട്ടം മാനസികാരോഗ്യ കേന്ദ്രത്തിലെ അന്തേവാസിയായ മഹാരാഷ്ട്ര സ്വദേശിനി ജിയ റാം ജിലോട്ടി(30)നെ വ്യാഴാഴ്ച പുലര്ച്ചെയാണ് മരിച്ച നിലയില് കണ്ടെത്തിയത്. ശ്വാസം മുട്ടിച്ചും കഴുത്ത് ഞെരിച്ചും കൊലപ്പെടുത്തിയതാണെന്ന് പോസ്റ്റ് മോര്ട്ടത്തില് വ്യക്തമായി. ഉച്ചയ്ക്ക് കഴിച്ച ഭക്ഷണം മാത്രമാണ് വയറ്റിലുണ്ടായിരുന്നത്. ബുധനാഴ്ച വൈകിട്ട് ആറിനാണ് മരണമെന്നാണ് നിഗമനം.
ബുധനാഴ്ച വൈകിട്ട് ജിയ റാം ജിലോട്ടും കൊല്ക്കത്ത സ്വദേശിനിയായ അന്തേവാസിയും തമ്മില് സെല്ലിനുള്ളില് കിടക്കയെ ചൊല്ലി സംഘര്ഷമുണ്ടായിരുന്നു. കൊല്ക്കത്ത സ്വദേശിനിക്ക് പരിക്കേറ്റത് ശ്രദ്ധയില്പ്പെട്ട ജീവനക്കാര് ഉടന് തന്നെ അവരെ മറ്റൊരു സെല്ലിലേക്ക് മാറ്റി ചികിത്സ നല്കിയെങ്കിലും ജിയറാം അലോട്ടിനെ പരിശോധിച്ചിരുന്നില്ല.
എന്നാല്, ജിയ റാം മരിച്ചത് വ്യാഴാഴ്ച രാവിലെ മാത്രമാണ് അധികൃതര് അറിഞ്ഞത്. ജീവനക്കാര്ക്ക് വീഴ്ചയുണ്ടായോയെന്ന് ആരോഗ്യവകുപ്പും അന്വേഷിക്കുന്നുണ്ട്. സംഭവത്തില് പോലീസ് കൊലപാതകത്തിന് കേസെടുത്തു.
Top