ന്യുഡൽഹി : ബിജെപിയുടെ ഔദ്യോഗിക തിരഞ്ഞെടുപ്പ് അക്കൗണ്ടിൽ കോൺഗ്രസിനേക്കാൾ 75 മടങ്ങ് കൂടുതൽ ഫണ്ടുണ്ടെന്ന് കോൺഗ്രസ് ട്രഷററും രാജ്യസഭാ എംപിയുമായ അജയ് മാക്കൻ. വ്യാഴാഴ്ച (ഡിസംബർ 11, 2025) രാജ്യസഭയിൽ തിരഞ്ഞെടുപ്പ് പരിഷ്കാരങ്ങളെക്കുറിച്ചുള്ള ചർച്ച ഉദ്ഘാടനം ചെയ്തുകൊണ്ട് പറയുകയായിരുന്നു .മുതിർന്ന കോൺഗ്രസ് നേതാവും പാർട്ടിയുടെ ട്രഷററും എംപിയുമായ അജയ് മാക്കൻ രാജ്യസഭയിൽ പറഞ്ഞ കണക്കുകളാണ് ഇപ്പോൾ വലിയ ചർച്ച ആയിരിക്കുന്നത് . ഓരോ ലോക്സഭാ തിരഞ്ഞെടുപ്പിനും മുൻപായി തിരഞ്ഞെടുപ്പ് കമ്മിഷൻ രാഷ്ട്രീയ പാർട്ടികളുടെ ആസ്തിവിവര കണക്കുകൾ പുറത്തുവിടാറുണ്ട്. ഈ കണക്കുകൾ ചൂണ്ടിക്കാട്ടിയായിരുന്നു രാജ്യസഭയിൽ അജയ് മാക്കന്റെ പ്രസംഗം.
2004ൽ ബിജെപിയുടെ ബാങ്ക് ബാലൻസ് 88 കോടി രൂപയായിരുന്നു. 2024ലെ കണക്കുപ്രകാരം ബാലൻസ് 10,107 കോടി രൂപയായെന്ന് മാക്കൻ പറഞ്ഞു. ഇക്കാലയളവിൽ കോൺഗ്രസിന്റെ ബാലൻസ് ഉയർന്നത് 38 കോടിയിൽ നിന്ന് 133 കോടിയായി മാത്രം.
2009ൽ ബിജെപിയുടെ ബാലൻസ് 150 കോടിയും കോൺഗ്രസിന്റേത് 221 കോടിയുമായിരുന്നു. 2014ൽ ബിജെപി വീണ്ടും കേന്ദ്രത്തിൽ അധികാരത്തിലെത്തി. നരേന്ദ്ര മോദി പ്രധാനമന്ത്രിയായി. അപ്പോൾ ബിജെപിക്ക് 295 കോടിയേ ഉണ്ടായിരുന്നുള്ളൂ. 2019 ആയപ്പേഴേക്കും 3,562 കോടി രൂപയായി. കോൺഗ്രസിന്റെ ബാലൻസ് 315 കോടി. 2024ൽ ബിജെപിയുടെ ബാലൻസ് 10,000 കോടിക്ക് മുകളിലെത്തിയപ്പോൾ കോൺഗ്രസിന്റേത് കുറഞ്ഞ് വെറും 133 കോടിയായെന്നും മാക്കൻ പറഞ്ഞു.
കോൺഗ്രസിന് ഫണ്ട് നൽകിയാൽ ഇ.ഡിയെയും ആദായ നികുതി വകുപ്പിനെയും ഉപയോഗിച്ച് ഉപദ്രവിക്കുമെന്ന ഭീഷണയുണ്ടെന്ന് ചില വ്യവസായികൾ തന്നോട് പറഞ്ഞതായി മാക്കൻ പറഞ്ഞു. പാർട്ടിക്ക് ഫണ്ട് കിട്ടാൻ പ്രയാസം നേരിടുകയാണ്. ബിജെപിക്ക് വാരിക്കോരി സംഭാവന ലഭിക്കുന്നു. പ്രതിപക്ഷ പാർട്ടികൾക്ക് പണം കിട്ടുന്നത് അവർ തടയുകയും ചെയ്യുന്നു.
2009ൽ ഭരണ-പ്രതിപക്ഷ പാർട്ടികൾക്കിടയിലെ ബാങ്ക് അക്കൗണ്ട് ബാലൻസ് അനുപാതം 60:40 ആയിരുന്നു. ഇപ്പോഴത് 99:1 എന്ന അവസ്ഥയിലാണ്. ഇങ്ങനെയാണെങ്കിൽ തിരഞ്ഞെടുപ്പിലും മറ്റും പ്രതിപക്ഷ പാർട്ടികൾക്ക് എങ്ങനെ ഭരണപക്ഷവുമായി മത്സരിക്കാനാകുമെന്നും മാക്കൻ ചോദിച്ചു. രാഷ്ട്രീയ പാർട്ടികളിലേക്ക് ഫണ്ട് ഒഴുകുന്ന പ്രോഗ്രസ് ഇലക്ടറൽ ട്രസ്റ്റിൽ നിന്നുള്ള കണക്കുപ്രകാരം 2024-25ൽ 915 കോടി രൂപയാണ് വിവിധ പാർട്ടികൾ സംയുക്തമായി നേടിയത്. ഇതിൽ 83 ശതമാനവും പോയത് ബിജെപിയിലേക്കാണെന്ന് മാക്കൻ പറഞ്ഞു.
2024ലെ ലോക്സഭാ തിരഞ്ഞെടുപ്പിന് മുൻപ് കോൺഗ്രസിന്റെ ബാങ്ക് അക്കൗണ്ടുകൾ മരവിപ്പിച്ചെന്നും അജയ് മാക്കൻ പറഞ്ഞു. തിരഞ്ഞെടുപ്പ് പ്രഖ്യാപനത്തിന് തൊട്ടുമുൻപ് ആദായനികുതി വകുപ്പ് 210 കോടി രൂപയുടെ നോട്ടിസ് കോൺഗ്രസിന് അയച്ചു. പിന്നീടവർ അക്കൗണ്ടിൽ നിന്ന് 135 കോടി രൂപയെടുത്തു. 2 കാര്യങ്ങൾ ചൂണ്ടിക്കാട്ടിയായിരുന്നു അക്കൗണ്ട് മരവിപ്പിക്കൽ. ഒന്ന്, ആദായ നികുതി റിട്ടേൺ സമർപ്പിക്കാൻ വൈകി. രണ്ട്, സംഭാവനയായി 14.40 ലക്ഷം രൂപ ക്യാഷായി വാങ്ങി.
ആരോപണങ്ങൾക്ക് മറുപടിയായി ബിജെപി അംഗം സുധാൻഷു ത്രിവേദി രംഗത്ത് വന്നു . തങ്ങളുടെ പരാതികൾക്ക് പരിഹാരം തേടുന്നതിന് ലഭ്യമായ വഴികൾ ഉപയോഗിക്കുന്നതിനുപകരം കോൺഗ്രസ് ഒരു ബഹളം സൃഷ്ടിക്കുകയാണെന്ന് ആരോപിച്ചു. ഒരു ക്രിക്കറ്റ് മത്സരത്തിന്റെ ഉദാഹരണം എടുത്ത്, ഒരു ടീമിന് ഒരു ബാറ്റ്സ്മാൻ പുറത്താണെന്ന് തോന്നുകയും അമ്പയർ അങ്ങനെ പ്രഖ്യാപിച്ചിട്ടില്ലെങ്കിൽ, അവർക്ക് റിവ്യൂ തേടാമെന്ന് അദ്ദേഹം പറഞ്ഞു. എന്നിരുന്നാലും, റിവ്യൂവിനായി അമ്പയറുടെ അടുത്തേക്ക് പോകുന്നതിനുപകരം, മൂന്നാം അമ്പയർ സ്വന്തമായി തീരുമാനം എടുക്കുമെന്ന് പ്രതീക്ഷിച്ച് കോൺഗ്രസ് പത്രസമ്മേളനങ്ങൾ നടത്തുകയാണ്.
Top